يعنى إيه #Gewe_binar_2015 ؟؟!! .
دى افتكاسة جويلية , لاختصار كلمة : Gewaily Webinar .. يعنى إيه بقى Webinar ؟؟!! .. باختصار برضه , دى معناها Web Seminar .. يعنى م الآخر , اجتماع لايف ع النت !! .. تشوفونا عليه صوت و صورة , و نكون على تواصل مع بعض , على مدار ساعة و نص أو ساعتين .. براحتنا بقى 🙂 .. . الموضوع سهل يعنى ؟؟!! .. . سهل جدا .. هو لينك حتضغط عليه , و تبقى معانا في ثانية .. تسمعنا و تشوفنا و تتواصل معانا على النت بالشات أثناء المحاضرة عادى خالص .. و نقدم من خلالها ليكم عدد من المعلومات التطبيقية جدا , و كإننا قاعدين في أوضة واحدة بندردش سوا !! .. . أهم النقاط التي ستتم مناقشتها في المحاضرة هي :
مهارات البيع , مش المفروض تكون عند التاجر أو المسوّق و خلاص .. مهارات البيع مهمة للكل تقريبا .. اللى عاوز يبيع سلعة .. و اللى عاوز يبيع خدمة .. و اللى عاوز يبيع دوا 😉 .. و عشان كده دايما بنقول إن مهنتنا علم و تجارة … صحة و بيع .. و حتى الجزء التجارى اللى فيها , ممكن ندرس فيه كتير عشان نتقنه قبل الممارسة العملية .. و ده ببساطة , لإن كل شىء بيتطور .. و اللى كان بيحصل فى السنين اللى فاتت من مهارات البيع , ممكن يكون قديم فى 2015 .. و عشان كده , احنا حنتكلم فى لقائناعن أحدث 7 مهارات للبيع فى 2015 .. مهارات حتخليك أقدر على كسب ثقة عميلك أو مريضك بإذن الله بشكل أسهل و أسرع ..
دى حاجة باتسأل عنها بشكل شبه يومى ع الفيس و فى المحاضرات , و ناقص إن الناس توقفنى فى الشارع عشان تسألنى بخصوصها !! .. , و عشان كده , مش حنحرمكم من حاجة , و حنعمل عرض مبسط و مفصل قدر الإمكان لأهم 7 كتب صيدلانية , المفروض تكون على مكتبك داخل الصيدلية فى 2015 .. حنتكلم عن أهمياتها المختلفة , و عن أولوياتها , و عن الكتب المناسبة للمبتدئين و المتقدمين و المحترفين , و ممكن كمان نتلقى أسئلة حضراتكم على الهواء مباشرة 😉 , بخصوص أهم الكتب التانية اللى موجودة فى السوق و لها علاقة بينا كصيادلة داخل الصيدليات ..
الـ smart phones سواء اللى عليها نظام الـ android أو الـ IOS , بقت تقريبا فى إيد أغلب الطلبة و الصيادلة .. و يبقى عيب لو مانتهزناش الفرصة دى فى إننا نوصل للمعلومة من خلالهم بشكل أفضل .. و عشان كده , حنناقش 7 تطبيقات مهمة لكل صيدلى واقف جوه صيدلية بيشتغل أو بيتدرب , و لازم يكونوا موجودين على موبايله فى سنة 2015 , و يقدر من خلالهم يحصل ع المعلومة بشكل أدق و أسرع بإذن الله , ..
.
رابط المحاضرة اونلاين بعد تسجيلها :
ملحوظة : الجزء الفعلي من المحاضرة بعد اول 14 دقيقة منها 😉
..
و ده رابط البوست اللي تم عليه الشات أثناء المحاضرة 😉 http://goo.gl/wF7bmC